Matendo ya Mitume 27:1 Acts 27:1

Basi ilipoamriwa tuabiri hata Italia, wakamtia Paulo na wafungwa wengine katika mikono ya akida mmoja, jina lake Yulio, wa kikosi cha Augusto.

Matendo ya Mitume 27:2 Acts 27:2

Tukapanda katika merikebu ya Adramitio iliyokuwa tayari kusafiri mpaka miji ya pwani za Asia, tukatweka; Aristarko, Mmakedonia wa Thesalonike, akiwa pamoja nasi.

Matendo ya Mitume 27:3 Acts 27:3

Siku ya pili tukawasili Sidoni; Yulio akamfadhili sana Paulo akampa ruhusa kwenda kwa rafiki zake, apate kutunzwa.

Matendo ya Mitume 27:4 Acts 27:4

Kutoka huko tukatweka, tukasafiri chini ya Kipro ili kuukinga upepo, kwa maana pepo zilikuwa za mbisho.

Matendo ya Mitume 27:5 Acts 27:5

Tulipopita bahari ya upande wa Kilikia na Pamfilia, tukafika Mira, mji wa Likia.

Matendo ya Mitume 27:6 Acts 27:6

Na huko yule akida akakuta merikebu ya Iskanderia, tayari kusafiri kwenda Italia, akatupandisha humo.

Matendo ya Mitume 27:7 Acts 27:7

Tukasafiri polepole kwa muda wa siku nyingi, tukafika mpaka Nido kwa shida; na kwa sababu upepo ulikuwa ukituzuia tukapita chini ya Krete, tukaikabili Salmone.

Matendo ya Mitume 27:8 Acts 27:8

Tukaipita kwa shida, pwani kwa pwani, tukafika mahali paitwapo Bandari Nzuri. Karibu na hapo pana mji uitwao Lasea.

Matendo ya Mitume 27:9 Acts 27:9

Na wakati mwingi ulipokwisha kupita, na safari ikiwa ina hatari sasa, kwa sababu siku za kufunga zilikuwa zimekwisha kupita, Paulo akawaonya,

Matendo ya Mitume 27:10 Acts 27:10

akawaambia, Wanaume, naona kwamba safari hii itakuwa na madhara na hasara nyingi, si ya shehena na merikebu tu, ila na ya maisha yetu pia.

Matendo ya Mitume 27:11 Acts 27:11

Lakini yule akida akawasikiliza nahodha na mwenye merikebu zaidi ya yale aliyoyasema Paulo.

Matendo ya Mitume 27:12 Acts 27:12

Na kwa sababu bandari ile ilikuwa haifai kukaa wakati wa baridi, wengi wao wakatoa shauri la kutweka kutoka huko ili wapate kufika Foinike, kama ikiwezekana, na kukaa huko wakati wa baridi; nayo ni bandari ya Krete, inaelekea kaskazini-mashariki na kusini-mashariki.

Matendo ya Mitume 27:13 Acts 27:13

Na upepo wa kusi ulipoanza kuvuma kidogo, wakidhani ya kuwa wamepata waliyoazimu kupata, wakang'oa nanga, wakasafiri karibu na Krete pwani kwa pwani.

Matendo ya Mitume 27:14 Acts 27:14

Baada ya muda mchache ukavuma upepo wa nguvu wa namna ya tufani, uitwao Eurakilo,

Matendo ya Mitume 27:15 Acts 27:15

merikebu iliposhikwa, na kutoweza kushindana na upepo, tukaiacha tukachukuliwa.

Matendo ya Mitume 27:16 Acts 27:16

Na tukipita upesi karibu na kisiwa kidogo kiitwacho Kauda tukadiriki kuikweza mashua; lakini kwa shida.

Matendo ya Mitume 27:17 Acts 27:17

Walipokwisha kuikweza wakatumia misaada, wakaikaza merikebu kwa kupitisha kamba chini yake, nao wakiogopa wasije wakakwama katika fungu liitwalo Sirti, wakatua matanga wakachukuliwa vivi hivi.

Matendo ya Mitume 27:18 Acts 27:18

Na kwa maana tulikuwa tukipigwa sana na ile tufani, siku ya pili yake wakaanza kuitupa shehena baharini.

Matendo ya Mitume 27:19 Acts 27:19

Siku ya tatu wakatupa vyombo vya merikebu kwa mikono yao wenyewe.

Matendo ya Mitume 27:20 Acts 27:20

Jua wala nyota hazikuonekana kwa muda wa siku nyingi, na tufani kuu ikatushika, basi tukakata tamaa ya kuokoka.

Matendo ya Mitume 27:21 Acts 27:21

Na walipokuwa wamekaa wakati mwingi bila kula chakula, Paulo akasimama katikati yao, akasema, Wanaume, iliwapasa kunisikiliza mimi na kutokung'oa nanga huko Krete, na kupata madhara haya na hasara hii.

Matendo ya Mitume 27:22 Acts 27:22

Sasa nawapeni shauri, iweni na moyo mkuu, kwa maana hapana hata nafsi mmoja miongoni mwenu atakayepotea, ila merikebu tu.

Matendo ya Mitume 27:23 Acts 27:23

Kwa maana usiku huu wa leo malaika wa Mungu yule ambaye mimi ni wake, naye ndiye nimwabuduye, alisimama karibu nami,

Matendo ya Mitume 27:24 Acts 27:24

akaniambia, Usiogope, Paulo, huna budi kusimama mbele ya Kaisari; tena, tazama, Mungu amekupa watu wote wanaosafiri pamoja nawe.

Matendo ya Mitume 27:25 Acts 27:25

Basi, wanaume, changamkeni; kwa sababu namwamini Mungu, ya kwamba yatakuwa vile vile kama nilivyoambiwa.

Matendo ya Mitume 27:26 Acts 27:26

Lakini hatuna budi kupwelewa katika kisiwa kimoja.

Matendo ya Mitume 27:27 Acts 27:27

Hata usiku wa kumi na nne ulipofika, tulipokuwa tukichukuliwa huko na huko katika bahari ya Adria, kama usiku wa manane baharia wakadhani ya kuwa wanaikaribia nchi kavu.

Matendo ya Mitume 27:28 Acts 27:28

Wakatupa bildi wakapata pima ishirini, wakaendelea kidogo wakatupa bildi tena, wakapata pima kumi na tano.

Matendo ya Mitume 27:29 Acts 27:29

Wakachelea tusije tukapwelewa mahali penye miamba, wakatupa nanga nne za tezi, wakaomba kuche.

Matendo ya Mitume 27:30 Acts 27:30

Na baharia walipotaka kukimbia na kuiacha merikebu, wakiishusha mashua baharini kana kwamba wanataka kutupa nanga za omo,

Matendo ya Mitume 27:31 Acts 27:31

Paulo akawaambia akida na askari, Hawa wasipokaa ndani ya merikebu hamtaweza kuokoka.

Matendo ya Mitume 27:32 Acts 27:32

Basi askari wakazikata kamba za mashua, wakaiacha ianguke.

Matendo ya Mitume 27:33 Acts 27:33

Na kulipokuwa kukipambauka Paulo akawasihi wote wale chakula, akisema, Leo ni siku ya kumi na nne kungoja na kufunga, hamkula kitu cho chote.

Matendo ya Mitume 27:34 Acts 27:34

Basi nawasihi mle chakula, maana itakuwa kwa wokovu wenu; kwa maana hapana hata unywele wa kichwa cha mmoja wenu utakaopotea.

Matendo ya Mitume 27:35 Acts 27:35

Alipokwisha kusema hayo akatwaa mkate, akamshukuru Mungu mbele yao wote akaumega akaanza kula.

Matendo ya Mitume 27:36 Acts 27:36

Ndipo wakachangamka wote, wakala chakula wenyewe.

Matendo ya Mitume 27:37 Acts 27:37

Na sisi tuliokuwa ndani ya merikebu tulipata watu mia mbili na sabini na sita.

Matendo ya Mitume 27:38 Acts 27:38

Walipokwisha kushiba wakaipunguza shehena ya merikebu, wakiitupa ngano baharini.

Matendo ya Mitume 27:39 Acts 27:39

Kulipokucha hawakuitambua ile nchi, ila waliona hori yenye ufuo, wakashauriana kuiegesha merikebu huko, kama ikiwezekana.

Matendo ya Mitume 27:40 Acts 27:40

Wakazitupilia mbali zile nanga, na kuziacha baharini, pamoja na kuzilegeza kamba za sukani, wakalitweka tanga dogo ili liushike upepo, wakauendea ule ufuo.

Matendo ya Mitume 27:41 Acts 27:41

Lakini wakafikia mahali palipokutana bahari mbili, wakaiegesha merikebu, omo ikakwama ikakaa isitikiswe, bali tezi ilikuwa imefumuliwa kwa nguvu za mawimbi.

Matendo ya Mitume 27:42 Acts 27:42

Shauri la askari lilikuwa kuwaua wafungwa, mtu asiogelee na kukimbia.

Matendo ya Mitume 27:43 Acts 27:43

Bali akida, akitaka kumponya Paulo, akawazuia, wasifanye kama walivyokusudia, akawaamuru wale wawezao kuogelea wajitupe kwanza baharini, wafike nchi kavu;

Matendo ya Mitume 27:44 Acts 27:44

nao waliosalia, hawa juu ya mbao na hawa juu ya vitu vingine vya merikebu. Na hivyo watu wote wakapata kuifikilia nchi kavu salama.